L’Unione Italiana con el sostegno de la Region Istriana, de la Cità de Buie, de la Region Veneto, del Ministero de i Afari Esteri e de la Coperazion Internazional, del Consiglio per le minoranze nazionali de la Republica de Croazia e del Uficio per i diriti de l’omo e i diriti dele minoranze nazionali de la Republica de Croazia bandisi el

14. Concorso video in tel ambito dela manifestazion “Festival de l’Istroveneto”

REGOLAMENTO

1. El concorso ga come scopo quel de documentar in istroveneto un momento de la storia pasada o presente.

2. El concorso ze verto a tuti, solo no ai profesionisti, e ga tre (3) categorie:

▪ Scole elementari (de la I a la IV clase)

sezion 1 – lavor individuale

sezion 2 – lavor de grupo (masimo 5 persone)

▪ Scole elementari (de la V a la VIII clase)

sezion 1 – lavor individuale

sezion 2 – lavor de grupo (masimo 5 persone)

▪ Scole medie superiori

sezion 1 – lavor individuale

sezion 2 – lavor de grupo (masimo 5 persone)

3. I video che ne mandè no ga limiti de genere (documentario, intervista, fiction e quel che volè). El tema ze libero, ma el parlado devi eser istroveneto, altrimenti no va ben.

4. Al concorso se pol mandar un (1) video che dura al masimo tre minuti.

5. Per mandar i lavori ze sai facile: basta andar qua soto e scarigar do robe:

1. roba: el modulo con i dati de impinir;

2. roba: la delibera firmada dei genitori

Per chi partecipa in te la sezion Lavori de grupo, la delibera devi eser firmada per ogni creatura che partecipa.

6. I lavori, insieme con el modulo dei dati e la delibera firmada, se pol mandar fina el 10 april 2026, al indirizo de posta ‘letronica: cultura@unione-italiana.hr. Per mandar i lavori se pol doperar anche We transfer o altre robe per mandar documenti pezanti.

7. I lavori sarà valutadi de una ‘pozita giuria nominada dal’Unione Italiana e come dizi lori, cusì ze.

8. Per tute tre le Categorie, podarà eser dadi un primo, un secondo e un terzo premio, per ogni sezion. In più, la Comision pol decider de dar una menzion a quei lavori meritevoli, ma no premiadi.

Sezion lavori individuali

Primo premio: 160,00 €

Secondo premio: 110,00 €

Terzo premio: 60,00 €

Sezion lavori de grupo

Primo premio: 200,00 €

Secondo premio: 150,00 €

Terzo premio: 100,00 €

9. Su la data e el logo de consegna dei premi sarè informadi per tempo.

10. Tuti quei che manda el lavor, creature e maestri, i ciaparà un atestato de partecipazion. I maestri mentori ciaparà un „buono acquisto“ (un’altra parola no gavemo trovà).