Me ciapa sì me ciapa ànsia,
co’ ghe penso a la mia infansia
creando in mi un dolse dolor,
profondo e drito inte’l cor
par cuel film che solo el scori,
fato de pochi e pàlidi colori
ma ben lìnpidi e vivi inte’l peto,
de cuel mondo cusì parfeto.

Cuanta strada che go fato,
ndando su e zo par rato
e senpre vanti anca scalso,
con cualche forsi paso falso
ma saltando più de un gropo,
che ormai cusì purtropo
cuela bela mia zoventù
no la torna indrìo più

Vardo i fioi e no me pento,
sì, el nostro mondo el jera lento
invese deso el par un treno,
ma co’l futuro no sereno.

Cuanta strada che go fato,
ndando su e zo par rato
e senpre vanti anca scalso,

con cualche forsi paso falso
ma saltando più de un gropo,
che ormai cusì purtropo
cuela bela mia zoventù
no la torna indrìo più
cuela bela mia zoventù
no la torna indrìo più