L’Unione Italiana, in colaborasion e co’l Patrocinio de la Cità de Buje e de la Region Istriana,
publica el

Concorso “Dìmela cantando”
14° edision

per cansoni nove che le sarà sonade e cantade a la 15° edision de ’l FESTIVAL DE L’ISTROVENETO

Cosa se ga de far?

Ghe vol mandar entro el 1° febrajo 2026 (no ezisti pròroghe) la canson per posta ‘letrònica a’l
indiriso:
cultura@unione-italiana.hr co’l tìtolo Dìmela Cantando 2026
Cuando che mandè la canson, gavè de scriver:
– tìtolo de la canson e chi che la ga scrita
– chi che ga fato la mùzica
– chi che la cantarà
– le parole in formato word
– la registrasion fata in studio bela e pronta, cusì come la ga de eser
– chi che pol e sa, che mandi el spartito.

Stè ’tenti:

Le canson che mandè
– le ga de èser scrite in istroveneto
– no le pol èser stade mai publicade, cantade o sonade prima
– no le pol durar più de 3 minuti e mezo (secondo più, secondo meno).
Un autor el pol mandar a’l màsimo 2 canson.

E cosa femo dopo?

Tute le canson che rivarà per tenpo e che le sarà fate come che scrivi cuà de sora, le sarà
valutade in modo anònimo de una comision fata aposta che ghe ne sielzarà 14 in baze a’l valor
artìstico e co’ particolare atension a’l testo.2025Cosa che dizi la comision, cusì ze e no se se devi rabiar.
Sielte le canson, tuti i autori i sarà informadi de come che ze andade le robe entro el 3 de
marzo 2026.
L’organizator el se ciol el dirito de domandarghe a chi che ga scrito le parole de canbiar la
parte che no la ze in bon istroveneto e, de conseguensa, de corèzar ’sta roba anca inte la parte
cantada. Stesa roba la val anca per la mùzica e l’arangiamento. In parole pòvere: voi fe’ el

vostro mejo, ma se’ d’acordo che cualcosa se pol anca canbiar, se servi, per far più bela la
canson.

Cosa ze de novo ancora?

Niente! Anca ‘sta volta niente bazi (muzicali, se capisi) per cantar: le canson le sarà sonade da’l
vivo de un’orchestra. Cuesto vol dir che, dopo la selesion, ve contatarà el produtor/capobanda
de l’orchestra per capir insieme come sonar ’sta canson a’l mejo.
Come la va ‘vanti la storia?

Ben. Cuando che se se ga meso tuti d’acordo sun tuto (testo, mùzica, arangiamento) e se
servirà canbiar cosa, gavaré un poco de tenpo per méter a posto le robe e mandar la canson
come che la ga de zguardar per bon.
A i autori de le canson che le sarà sielte, ghe refondaremo le speze de incizion de la canson.

Cuando se vedemo dopo?

Cuando che l’orchestra la sarà pronta, se se incontra tuti insieme per far una prova generale.
E dopo, come senpre, faremo tre serate. Forsi anca cuatro o più. Insoma, vedaremo. Tute le
date, come l’órdine de ezibision, ve le faremo saver per tenpo.
Cosa se vinsi?

Le canson le sarà sonade e cantade da’l vivo. Le meje, le vinsarà el premio.

Che premio?

Premio de la Giurìa (per la meja canson): 1.000,00 euro;
Premio per le mejo parole: 500,00 euro;
Premio per el mejo arangiamento: 500,00 euro.
La giurìa la podarà dar anca fina 3 Mension per cualcosa de particolare che merita (ezecusion,
interpretasion…) de 300,00 euro l’una.
Premio de’l pùblico: 1.000,00 euro
Premio de i artisti: sorpreza!
El premio el ghe va a’l autor de’l testo de la canson, dopo sarà lu che el spartisi a chi che ’l vol.

E per finir

I autori i ghe cedi i diriti de autor a’l organizator per ’sta ocazion, ma isteso ghe resta i diriti
previsti da la lege.
E sì: chi che partèsipa a ’sto concorso el ze d’acordo co’ tuto cuel che scrivi cuà de sora, anca
de èser filmado!
Ve recordemo che l’istroveneto no’l ze solo ’rimòniche e bei veci tenpi, ansi, pol èser tuto cuel
che se vol e, sora de tuto, sarà apresade cuele canson co’ temàtiche e forme muzicali
contenporanee…de ancùo insoma.