Te go lasado ma te penso speso…prima e adeso, cuà dentro de mi
e pur lontan mi bela te vedo…e ancora no credo, che i dize de ti.
Ricordo le ore, cuele parole…tante e “sonore”, ze poco a che far
lasa che i ciàcoli, i parla a voze…rincara la doze, e no dizmentigar.
Nisun no capisi “tragedie e onor”…cuanta tristesa e cuanto dolor.
No sa la fama, njanca la storia, de guera e de gloria, nisun no la sa.
Tiéntela streta de onji “favela”…la mula bela Istria d’Amor
Vàrdighe i oci, lìghila dentro…mazenjo o semento no ga solo cuor
Gìrite, vòltite, ribalta intorno…ze fia de’l Mondo prima de lu
No me interesa de cual dialeto…porta rispeto ma daghe de’l “Tu”
No i la conosi, no i pol capir…Istria per ti…podesi morir
Sonjo cuei oci che in ti bei riluzi…ma cuanti “sopruzi”, i ga pasà.
Tserco la fortsa, rezisto de giorno…me vardo intorno, e deso son cuà.
I te incorniza spumozi de vento…son propio contento, “fio son de ti”
E se te vardo el doltse sorizo…mi in ti vedo el vizo, e penso cusì:
Crédime “casa” la mia ze spesa…un poco mal mesa, e cos’ se pol far
ze solo do muri…bianchi e sicuri, ma de la finestra mi vedo el mar
Me ròziga tanto, sentsa, son perso…njanca el dezerto, no’l ze come ti
No i te conosi, no i pol capir…Istria per ti…mi devo…Partir!